გადაცემა ეძღვნება სასიქადულო მამულიშვილის, ქართული მწერლობის თვალსაჩინო წარმომადგნლის, შესანიშნავი მწერლის, დრამატურგის, ესეისტისა და საზოგადო მოღვაწის, დიდებული ქართველი ვაჟკაცის ნუგზარ შატაიძის ხსოვნას, რომელსაც 9 მარტს დაბადებიდან 70 წელი შეუსრულდებოდა.7 მარტს მწერალთა სახლში გაიმართა ნუგზარ შატაიძის დაბადების 70 წლისთავისადმი მიძღვნილი საღამო, სადაც გაიხსენეს ნუგზარი, როგორც მწერალი, ესეისტი, მსახიობი, მომღერალი და უბრალოდ, წესიერი, პატიოსანი, შესანიშნავი მოქართულე დიდებული ქართველი ვაჟკაცი.სტუმრები:ზურაბ კანდელაკი, არმაზ ბურნაძე, ელგუჯა ბერიშვილი.ავტორი და წამყვანი: ივანე ჯაფარიძე

გადაცემა ქართველთა და ებრაელთა შორის 26-საუკუნოვან მეგობრობასა და თანაცხოვრებას ეძღვნება. საქართველოს მთავრობის გადაწყვეტილებით 2014 წელი გამოცხადებულია ქართულ-ებრაული ურთიერთობისა და 26-საუკუნოვანი მეგობრობის საიუბილეო წლად. თამამად და სიამაყით შეგვიძლია ვთქვათ, რომ ქართულ-ებრაული ურთიერთობა მართლაც არის სამაგალითო და ნამდვილი საგანძური მთელი მსოფლიოსთვის, რადგან მსგავს მოვლენას - 26 საუკუნის განმავლობაში შეიფარო და ერს შეუნარჩუნო ღირსება, საკუთარი რწმენა და თვითმყოფობა, არ არსებობს მსოფლიო ისტორიაში. 26 საუკუნოვანი ისტორიის ფურცლების გაცოცხლება და ერთა შორის მეგობრული ურთიერთობების გაღრმავებაა ამ ღონისძიებების მთავარი ლაიტმოტივი. 26-საუკუნოვანი ქართულ-ებრაული ურთიერთობების მსოფლიო არენაზე გატანას, გარდა კულტურულისა, უდიდესი პოლიტიკური დატვირთვაც აქვს, რადგან ქართველთა და ებრაელთა 26-საუკუნოვანი თანაცხოვრების უნიკალური ფაქტი ის უნიკალური მაგალითია, რომელსაც ტირაჟირება სჭირდება, რათა საქართველოს მიმართ ამ თვალსაზრისით პრეტენზია და სალაპარაკო არავის ჰქონდეს. მსოფლიომ ჩვენგან უნდა აიღოს მაგალითი ხალხთა შორის ძმობისა და მეგობრობის დასამკვიდრებლად.27 თებერვალს ებრაელთა სახლში ქ-ნმა იზა ვეფხვაძემ წარმოადგინა ლიტერატურული თეატრის სპექტაკლი სახელწოდებით „ამ სიყვარულით შევცვლით სამყაროს“, რომელმაც დამსწრე საზოგადოებაზე დიდი შთაბეჭდილება მოახდინა. ეს სპექტაკლი სრულად ასახავს ქართულ-ებრაული ურთიერთობების ისტორიას. სტუმარი: ხარაგაულის რევაზ თაბუკაშვილის სახელობის ლიტერატურული თეატრის დამაარსებელი, ხელმძღვანელი და მსახიობი ქ-ნი იზა ვეფხვაძე.ავტორი და წამყვანი: ივანე ჯაფარიძე

შიო არაგვისპირელმა ქართულ მწერლობაში შემოიტანა და დაამკვიდრა პროზაული ჟანრის მცირე ფორმები - ფსიქოლოგიური ნოველა, ეტიუდი, ესკიზი, სურათი; მისი ნაწარმოებები ახალი საფეხური იყო ქართულ პროზაში არამარტო ფორმით, არამედ იდეურად და თემატურადაც. წარმოაჩინა საქართველოს იმდროინდელ ყოფაში დამკვიდრებული ახალი საზოგადოებრივი ურთიერთობანი, შეეხო თავისი ეპოქის ყველაზე მტკივნეულ საკითხებს, დაგვანახა "ცხოვრების სიმწარე". ამის გამო იყო, რომ აკაკი წერეთელმა მას "ახალი სკოლის მეთაური" უწოდა.აღსანიშნავია, რომ ამ გადაცემაში პირველად წარსდგა მსმენელთა წინაშე და საფუძველი ჩაეყარა თეატრალურ-ლიტერატურულ დასს „ცოცხალი სიტყვა“, რომლის მიზანია მრავალსაუკუნოვანი ქართული მწერლობის პოპულარიზაცია. გვწამს, თეატრალურ-ლიტერატურულ დასს „ცოცხალი სიტყვა“ დიდი წარმატება ექნება მომავალში. სტუმრები: ახალგაზრდა მსახიობები ნანა კვარაცხელია, თამარ ჟორდანია, რევაზ ქარცივაძე, ნათია მელიქიშვილი, მწერალი და მეცნიერი, ლიტერატურულ ჟურნალ „ჩვენი მწერლობის“ მთავარი რედაქტორი ბ-ნი როსტომ ჩხეიძე, ილია ჭავჭავაძის ლიტერატურულ–მემორიალური მუზეუმის სამუზეუმო კომპლექსის (რომელშიც შედის შიო არაგვისპირელის სახლ-მუზეუმი) დირექტორის მოადგილე, ქ-ნი თამარ კობახიძე. ავტორი და წამყვანი: ივანე ჯაფარიძე

გადაცემა გამოჩენილ ქართველ  კინორეჟისორს ოთარ იოსელიანს ეძღვნება, რომელსაც 2 თებერვალს დაბადებიდან 80 წელი უსრულდება. თქვენთან ერთად ვულოცავ ბ-ნ ოთარს ამ საიუბილეო თარიღს. ოთარ იოსელიანმა 1952  წელს დაამთავრა თბილისის კონსერვატორია კომპოზიციის, დირიჟორისა და ფორტეპიანოს  განხრით. 1953 წელს მოსკოვში მიემგზავრება, სადაც ორი წელი მოსკოვის სახელმწიფო უნივერსიტეტის ფიზიკა-მათემატიკის ფაკულტეტზე სწავლობდა.  1961 წელს დაამთავრა რუსეთის სახელმწიფო კინემატოგრაფიის ინსტიტუტი (ВГИК), სადაც ალექსანდრე დოვჟენკოსა  და  მიხეილ ჭიაურელის  მოსწავლე იყო.

24 იანვარი  ქართლ-კახეთის  სასიქადულო  მეფის  ერეკლე 11-ის გარდაცვალების დღეა. მის სახელთან  მრავალი  ლეგენდაა დაკავშირებული, რაც ხშირად არც თუ სახარბიელო კონტექსტში მოიხსენიება ხოლმე.  გადაცემაში საუბარია ერეკლე მეორის ეპოქაზე და იმ შეხედულებებზე, რაც ამ უებრო მებრძოლისა და მეომარი მეფის მიმართ გაისმის ხოლმე საზოგადოებაში. ხშირად ეს შეხედულებები დილეტანტურია და აბსოლუტურად არ შეესაბამება სიმართლეს. სტუმრები: პროფესორები თეიმურაზ პეტრიაშვილი და მიხეილ ბახტაძეგადაცემის ავტორი და წამყვანი: ივანე ჯაფარიძე

ქართულმა საზოგადოებამ კიდევ ერთი დიდი დანაკლისი განიცადა. მაცხოვრის შობის დღეს თამარ ერისთავი ისევე უხმაუროდ განერიდა სამზეოს, როგორც განვლო მისმა მთელმა ცხოვრებამ. იგი იმ ღირსეული ოჯახის წარმომადგენელი ბრძანდებოდა, რომლის თუნდაც ერთი წევრის ხსენებაც კი სიამაყით აღავსებს ნებისმიერ ქართველს. ეკატერინე გაბაშვილი - ჩვენი სახელოვანი მწერალი, "მაგდანას ლურჯას" ავტორი, თამარ ერისთავის დიდი ბებია გახლდათ დედის მხრიდან. ბაბუა – ეკატერინეს სიძე, ცნობილი პოეტი და საზოგადო მოღვაწე, საქართველოს მწერალთა კავშირის დამაარსებელი და მისი პირველი თავმჯდომარე - კოტე მაყაშვილი. დეიდა – 1921 წელს რუსეთის მე-11 არმიის წინააღმდეგ კოჯრის ბრძოლაში გმირულად დაღუპული მოწყალების და მარო მაყაშვილი. ბიძა კი - ცნობილი მხატვარი შალვა მაყაშვილი. თამარ ერისთავის შემოქმედება უდიდესი სიბრძნით, სიწრფელითა და წარუვალი სამყაროული გრძნობებითაა გაჯერებული. ასევე საყურადღებო და მნიშვნელოვანია მისი ნაშრომი რუსთველოლოგიაში. პოეტების ქვეყანაში მის პოეზიას ყოველთვის ჰყავდა, ჰყავს და ეყოლება თაყვანისმცემელი. ჩვენ, თამარ ერისთავის არა მხოლოდ პოეზია გვეძვირფასება, არამედ ღირსებით შემკული დიდი მამულიშვილი, სამშობლოს განუხრელი ჭირისუფალი, უმშვენიერესი, უსათნოესი და უსპეტაკესი ქართველი ქალი და უგულითადესი მეგობარი, რომლის სიახლოვე მუდამ გვალაღებდა, გვამაღლებდა, სითბოთი და სიამაყით გვავსებდა. ვალმოხდილი წავიდა ჩვენგან ღირსებით, სილამაზით, ჭეშმარიტი ქართული კდემითა და ზნეობით შემკული დიდებული ქალბატონი - თამარ ერისთავი, რომელმაც სანაცვლოდ დაგვიტოვა დიდი გულისტკივილი და მასთან ერთად განვლილი ცხოვრების დაუვიწყარი წლების მარადიული ხსოვნა.

ვახუშტის დედა მის მშობიარობას გადაჰყვა და  დედა არ ახსოვდა. მას ზრდიდა დიდედა – არაჩვეულებრივი ქალბატონი ეკატერინე ბიძინაშვილი. ის იყო ქართული ხალხური სიტყვიერების ცოცხალი საგანძური. იცოდა უამრავი ლექსი, ანდაზა, ზღაპარი. აღზრდის საქმეში რომ უზადო იყო, ამის დასტური გახლდათ მისი ვაჟი ვახტანგ კოტეტიშვილი - ქართული მეცნიერული ფოლკლორისტიკის ფუძემდებელი და თავად ვახუშტი. ორივე მისი გაზრდილი იყო. მის ხელში ორივეს ყური მიეჩვია ქართულ სიტყვას, რაც მამა-შვილის ეროვნულ სულისკვეთებას აყალიბებდა და აძლიერებდა. ამიტომ იყო, რომ  მამაც და შვილიც ჩარჩოებს  ვერ ეგუებოდნენ, რასაც შეეწირა კიდეც ვახტანგ კოტეტიშვილი. ბედის ირონიით, სანატრელი ვაჟიშვილის გაჩენასთან ერთად თბილისის ერთ-ერთი საუკეთესო ოჯახის მოშლა 1937 წლიდან დაიწყო. ამის შესახებ დეტალურად უამბობს მკითხველს ავტობიოგრაფიული რომანი ,,ჩემი წუთისოფელი”, რომელიც ვახუშტი კოტეტიშვილმა თავის ოჯახს, მამის მოღვაწეობასა და საკუთარ ბავშვობას მიუძღვნა.სტუმრები:მეუღლე მზეო გოგოჭური, აღმოსავლეთმცოდნე, პოეტი და მთარგმნელი ნომადი ბართაია, ფილოლოგები გიგი ხორნაულს და ნანა კოტეტიშვილი.ავტორი და წამყვანი: ივანე ჯაფარიძე

გადაცემა ეძღვნება  ქართული კინოსა და თეატრის უბრწყინვალესი წარმომადგენლის, საქართველოს სახალხო არტისტის მიხეილ ვაშაძის ხსოვნას,რომლის დაბადებიდან 105 წელი შესრულდა. სტუმრები:მიხეილ ვაშაძის ვაჟი ბ-ნი თამაზ ვაშაძე, ქ-ნი თინა დარბაიძე და ბ-ნი  ვახტანგ კაპანაძე.ავტორი და წამყვანი: ივანე ჯაფარიძე

პროფესორ რევაზ სირაძის შეუმცდარი შეფასება: „ემირ ბურჯანაძისეული სახვითი ფორმები განსაზღვრულია ქართული ანბანის ხასიათით. ქართული ანბანი ჰკარნახობს მას ნებისმიერი სახის ფორმადქმნადობას. მისთვის, უპირველეს ყოვლისა, ანბანშია გასაგნებული ქართული მსოფლაღქმის სპეციფიკა, ამიტომაა, რომ ანბანთწერის თუ ანბანთქანდაკების და საერთოდ, ანბანთხელოვნების ტრადიციები თავს იჩენს არა მხოლოდ სადღეისოდ მოდელირებულ თანამედროვე გაზეთების სახელდებათა ემირ ბურჯანაძის მიერ შექმნილ ფორმებში, არამედ ჰერალდიკურ სიმბოლიკაში ქალაქ თბილისისა თუ ქალაქ თელავისა. ასე რომ, მისი მხატვრული აზროვნების, მისი სახისმეტყველების საფუძველთა საფუძველი ქართული ასოებია. ქართულ ასოებში მხატვარი მხოლოდ წერის საშუალებებს კი არ ხედავს, არამედ აზროვნების პრინციპებს. თვით ასოების ფორმებშიაო „კოდირებული“ ქართველთა სინამდვილისადმი დამოკიდებულების წესი და რიგი. შეიძლება ითქვას, რომ მისთვის ბგერითი შინაარსის გარეშეც „ხმოვანებს“ ქართული ასო-ნიშნები.ბ-ნი ემირის შემოქმედების მასშტაბურობას, უპირველეს ყოვლისა, ის უმნიშვნელოვანესი ფაქტორი განსაზღვრავს, რომ იგი ღრმად ეროვნულ ფესვებზე დგას და არასოდეს ტოვებს ქართველობის განცდა“.

ცხოველებში კი არა ადამიანებშიც იშვიათად მეგულება ცხოვრების ისეთი მოწესრიგებული წესის მქონე არსება, როგორიც მგელია. არ შეიძლება  იმ კატასტროფული ვითარების შესახებ არ ითქვას, რომელშიც საქართველოს ცხოველთა სამყარო აღმოჩნდა. რამდენიმე მაგალითის მოტანაც საკმარისია იმ მდგომარეობის წარმოსადგენად, რაშიც დღეს საქართველოს ცხოველთა სამყაროა. სხვადასხვა მონაცემებით 1990 წელთან შედარებით, საქართველოში ჯიხვის რიცხოვნობამ დაახლოებით 55-60%-ით იკლო, ირმისამ - 60-65%-ით, არჩვისამ 50-55%-ით, შვლისამ 40-45%-ით, დათვისამ 50-55%-ით, აფთარი ხუთიოდე თუ იქნება დარჩენილი, ფოცხვერი 100-150-დე, ნიამორი 150-160 ინდივიდამდე, ჯიქი დღეს აღარაა საქართველოში, ასეთივე ბედი ეწია ქურციკს, რომელიც დროდადრო აზერბაიჯანიდან შემოდიოდა, მაგრამ უკან გაქცევას ვეღარ ასწრებდა. 

ახალი ამბავი არ არის ქართული კულტურის ძეგლებს, ეკლესია- მონასტრებს სომხები რომ გვედავებიან. სწორედ ამას მიუძღვნა თავისი გენიალუირი ნაშრომი „ქვათა ღაღადი“ წმინდა ილია მართალმა, დიდმა ილია ჭავჭავაძემ. ჩვენი ვალიცაა ამოვიღოთ ხმა, პირუთვნელად ვთქვათ სათქმელი იმ თემაზე, რომელიც დიდი ხანია აწუხებს ჩვენს საზოგადოებას. სტუმარი: არმენოლოგი, პროფესორი ბონდო არველაძე. ავტორი და წამყვანი: ივანე ჯაფარიძე

საკითხი, რაზეც საუბარია გადაცემაში, ეხება ჩვენს ეროვნულ საგანძურს, ქართული კულტურის ძეგლებს, რომელთაც სომხები გვედავებიან. სომეხი არქიტეტქტურის სპეციალისტის, სამველ კარაპეტიანის მტკიცებით, საქართველო და თურქეთი სომხურ ტაძრებს იტაცებენ.მსგავსი ისტორიული „აღმოჩენები” სომხებს და, მათ შორის, თავად სამველ კარაპეტიანსაც არაერთხელ გაუკეთებიათ. ბოლოსდაბოლოს   უნდა ამოვიღოთ ხმა, სირაქლემას პოზაში დგომას თავი გავანებოთ და პირუთვნელად ვთქვათ სათქმელი, რომელიც ძალზე დიდი ხანია აწუხებს ჩვენს საზოგადოებას. უნდა ვიცოდეთ რას გვედავებიან სომეხი მეცნიერები ქართველებს!              სტუმარი: არმენოლოგი, პროფესორი ბონდო არველაძე. ავტორი და წამყვანი: ივანე ჯაფარიძე

საიდ მულიანს ფერეიდანის ილია ჭავჭავაძე დავარქვი და ეს სრულებითაც არ არის გადაჭარბებული, რადგან ფერეიდნელი ქართველებისათვის საიდი იგივეა, რაც საქართველოსთვის ილია იყო. ფერეიდნიდან ჩამოსვლისთანავე საიდი ჩვენს პროგრამას ესტუმრა და მრავალი სასიხარულო ამბავიც ჩამოიტანა - ირანში გაიხსნა ქართული სკოლა, სადაც საიდ მულიანი ქართულ წერა-კითხვას ასწავლის იქაურ ქართველებს. ამ უმნიშვნელოვანეს მოვლენას ქართველი მსმენელის დიდი გამოხმაურება და მხარდჭერა მოჰყვა, რაც სკოლის გახსნის დიდ მნიშვნელობას ადასტურებს.საინტერესოა აგრეთვე ის გარემოება, რომ საიდმა შექმნა შესანიშნავი წიგნი, რომელიც ეხება სპარსეთში (შემდგომ ირანის ისლამური რესპუბლიკა) ქართველების  მოღვაწეობას.სტუმარი: ფერეიდნელი ქართველი საიდ მულიანი  ავტორი და წამყვანი: ივანე ჯაფარიძე

100 წელი შესრულდა ცნობილი ისტორიკოსის, საქართველოს მეცნიერებათა აკადემიის წევრ-კორესპონდენტის, მეცნიერების დამსახურებული მოღვაწის აკაკი სურგულაძის დაბადებიდან. მას დღემდე დიდი სიყვარულით და პატივისცემით იგონებენ კოლეგები და აღზრდილები, რაც მის დიდ ადამიანურ თვისებებზე მეტყველებს. სტუმრები: აკადემიკოსი ნანა ხაზარაძე, აკადემიის წევრ-კორესპონდენტი გურამ ლორთქიფანიძე, პროფესორები ოთარ ჟორდანია, ოთარ ჯანელიძე, პაატა სურგულაძე.ავტორი და წამყვანი ივანე ჯაფარიძე

ჯერ 40 დღეც არ გასულა შესანიშნავი ქართველი პოეტის, დავით აღმაშენებლის, ილია ჭავჭავაძისა და აკაკი წერეთლის პრემიების ლაურეატის, „ქართული პოეზიის რაინდის“ ანზორ აბულაშვილის გარდაცვალებიდან. იგი იყო უპატიოსნესი, წესიერი, ღირსებით შემკული პროვნება და შესანიშნავი პოეტი, რომლის ლექსი „მახარობელი“ (წუხელის ბიჭი დაბადებულა...) დაწერისთანავე აიტაცა ხალხმა და მას ხშირად გაიგონებთ სხვადასხვა შეკრებებსა და ლიტერატურულ საღამოებზე.სტუმრები: პროფესორი დავით მაჭავარიანი, პოეტები ნინო ქუთათელაძე და თემურ ჩალაბაშვილი, მწერალი და ჟურნალისტი ელგუჯა ლებანიძე.წამყვანი: ივანე ჯაფარიძე

მეგობრები იხსენებენ შესანიშნავ ექიმსა და დიდებულ პოეტს, გამოჩეულ ქართველ ვაჟკაცს, თბილისის აშუღსა და იმერეთის ტრუბადურს თამაზ სანებლიძეს, რომელიც რამდენიმე თვის წინათ განერიდა ამ წუთისოფელს, ჩვენ კი დაგვიტოვა დიდი სევდა და გულისტკივილი, რომელიც არასოდეს განელდება.სტუმრები: სოსო ლაღიძე, ტრისტან სარალიძე, დიმიტრი ჯაიანი და გრიგილ ჩიგოგიძე,გადაცემის ავტორი და წამყვანი: ივანე ჯაფარიძე

დღევანდელი შეხვედრა შესანიშნავ პოეტთან და დიდებულ პიროვნებასთან - რობერტ მესხთან, კიდევ ერთხელ მიგვანიშნებს მის საოცარ ნიჭიერებასა და  ადამიანური ურთიერთობების განსაკუთრებულობაზე. ეს განსაკუთრებული გულითადობა, მზიანობა მისი სულისა,  მისი მშობლიური კუთხის - აფხაზეთის დამსახურებაა, საიდანაც მოყვება მას სოხუმის ზღვისა და მზის შეუდარებელი სითბო, რომელიც დღემდე ენერგიით აღავსებს არა მხოლოდ პოეტ რობერტ მესხს, არამედ მის ირგვლივ მყოფ ყველა ადამიანს. სოხუმია ის საბედისწერო სიტყვაცა და განცდაც, რომელიც განუშორებელია როგორც მისი მხატვრული, ისე პიროვნული სამყაროსაგან. სტუმრები: რობერტ მესხი, ნინო ქოქოსაძე, კახა კვაშილავა.ავტორი და წამყვანი: ივანე ჯაფარიძე

ვაშინგტონში მცხოვრებ ჩვენს თანამემამულეს, უხუცეს ქართველ ემიგრანტს პეტრე ხვედელიძეს 25 ივნისს დაბადებიდან 95 წელი უსრულდება და ჩვენ, საქართველოში მცხოვრები მოქალაქეები ვალდებულნიც კი  ვართ ეს საიუბილეო თარიღი სათანადოდ აღვნიშნოთ, რადგან პეტრე ხვედელიძეს ერთი წამითაც არ უცხოვრია საქართველოსა და ჩვენზე ფიქრის გარეშე. ძალზე მნიშვნელოვანია ის გარემოებაც, რომ ბ-ნი პეტრე თავის დაბადების დღეს აღნიშნავს ვაშინგტონის სამხედრო ჰოსპიტალში მძიმედ დაჭრილ ქართველ ჯარისკაცებთან ერთად, რომლებიც სამკურნალო-სარეაბილიტაციო კურსს აქ გადიან. ბ-ნი პეტრე ის პიროვნებაა, რომელიც თავისი ასაკის მიუხედავად, თითქმის ყოველდღე აკითხავს ჩვენს ჯარისკაცებს და მორალურად თუ ფსიქოლოგიურად ამხნევებს, რწმენას უნერგავს მათ. როგორც კიდევ ერთი ქართველი ემიგრანტი  ბ-ნი ნიკო თოფურია აღნიშნავდა - „ბ-ნი პეტრე ხვედელიძე ბიბლიური კაციაო“ და თუ ბ-ნი პეტრეს ცხოვრებას თვალს გადავავლებთ, ეს სრული ჭეშმარიტებაა. დიდხანს სიცოცხლეს ვუსურვებთ ქართული ემიგრაციის სინდისს ბ-ნ პეტრე ხვედელიძეს.სტუმრები: სოფიკო ჯერვალიძე, რუსუდან კობახიძე, ია ბაგრატიონ-მუხრანელი, უშანგი ქადაგიშვილი, ქეთევან ქიქოძე, ხატია ცარციძე, სანდრო ქურხული, თიკო ფოცხვერაძე, ნინო ზივზივაძე, მარი რევიშვილი, ანა ხოხიაშვილი, სალომე კარსანიძე.ავტორი და წამყვანი: ივანე ჯაფარიძე

გადაცემა ეძღვნება შესანიშნავ პიროვნებას, ქართული მწერლობის თვალსაჩინო წარმომადგენელს, შიო მღვიმელისა და მაყვალა მრევლიშვილის პრემიების ლაურეატს, „ღირსების ორდენის” კავალერს, „ქართული კულტურის მოამაგის“ საპატიო ჯილდოს მფლობელს, დიდი ოჯახის დიდ დედას, ყველასთვის საყვარელ ქალბატონ დოდო ხიმშიაშვილს, რომელსაც დაბადებიდან 90 წელი შეუსრულდა.     სტუმრები:  როსტომ ჩხეიძე, მარიამ წიკლაური, ირმა მალაციძე, თამარ შაიშმელაშვილი, ნინო ჩხიკვიშვილი. ავტორი და წამყვანი: ივანე ჯაფარიძე  

ჩვენი გადაცემის სტუმარია გეოლოგიურ მეცნიერებათა დოქტორი გუგა ზაქარიაძე, ერთადერთი შვილი  ქართული თეატრისა და კინოს მშვენების სერგო ზაქარიაძისა და მსახიობ მერი ქორელისა, შვილიშვილი პირველი ქართველი ტრაგიკოსი ქალის ნუცა ჩხეიძისა და მსახიობისა და რეჟისორის მიხეილ ქორელისა, შვილთაშვილი პირველი ქართველი საოპერო მომღერლის, იტალიაში განათლებამიღებული ცნობილი ბანის ფილიმონ ქორიძისა. გუგა ზაქარიაძემ „უღალატა“ ოჯახურ ტრადიციას და სულ სხვა, ბუნებისმეტყველის - გეოლოგის პროფესია აირჩია, სადაც მნიშვნელოვან წარმატებებს მიაწია. აღსანიშნავია, რომ  ქართველ მეცნიერთაგან იგი პირველი იყო, რომელიც ამერიკელებმა დიდ სამეცნიერო გემ „ჩელენჯერზე“ მიიწვიეს ოკეანის ფსკერის შესასწავლად ჩასატარებელი კვლევებისათვის.     სტუმარი: გუგა ზაქარიაძეავტორი და წამყვანი: ივანე ჯაფარიძე